O Leyma Básquet Coruña gaña en Huesca e segue apuntando aos playoff

O Leyma Básquet Coruña conseguiu esta noite en terras oscenses unha gran vitoria, labrada fundamentalmente por unha boa defensa que, aínda que tivo erros, impediu aos locais xogar cómodos e desenvolver o seu habitual xogo agresivo e moi forte atrás.

Na primeira parte do choque reinou a igualdade tanto no nivel defensivo como de ataque de ambos os rivais, o que se traduciu nun alto nivel de anotación e un marcador alternante e de curtas vantaxes, sen que puidese albiscarse cal dos adversarios lograría facerse co partido. Unha situación que se mantivo moi similar no dez minutos de partido tras o descanso.

Con todo, as cousas comezaron a decantarse ao lado laranxa desde o inicio do último cuarto, cando o conxunto coruñés apertou máis aínda a súa intensidade defensiva, o que en boa medida desequilibrou aos xogadores das Penas Huesca, levoulles a descoidar o xogo en equipo e provocou reiteradas faltas de acerto nos seus tiros ao aro.

En declaracións de Tito Díaz tras o encontro, destacou a súa satisfacción porque os coruñeses souberon aplicar a lección aprendida na derrota da semana pasada contra os castellonencos, cando cederon nos últimos minutos polas présas por pechar o partido. Esta vez non foi así e os laranxas souberon administrar os 10 puntos de vantaxe que sumaron nos primeiros minutos do último cuarto, ata lograr terminar 14 puntos arriba, con resultado final de 64-78.

"Viñamos mentalizados de que hai que ter moito carácter para gañar aquí porque ese é un equipo que presiona e aperta moito", asegurou Tito Díaz, destacando que os seus non viñeron abaixo en momentos decisivos como algunhas perdas de balón que poderían minguar a súa confianza, pola contra "seguimos traballando en defensa, corremos cando podiamos e conectamos cos nosos pivotes".

Por último, o técnico laranxa lembrou que só quedan por xogar sete partidos nunha liga moi igualada. "De aquí ao final todos nos xogamos moito", recoñeceu, polo que cada encontro "será unha batalla distinta" que requirirá da máxima intensidade e preparación.

Esta web emprega cookies. Se continúas navegando entendemos que aceptas a nosa Política de cookies.