O Leyma Coruña quedou a un paso de imporse no derbi romano ante os Cafés Candeas, nun encontro vibrante, aínda que infestado de imprecisións por parte de ambos os conxuntos, e que se decidiu nos últimos minutos da contenda (84-73).
O partido comezou moi parello, cos dous conxuntos estudándose e con xogadores, como Jonathan Gilling, moi inspirados ante o seu exequipo. Un abaixo terminaba o primeiro cuarto para os laranxas (21-20) e comezaba o segundo cun parcial de 9-0 que lle daba a primeira vantaxe do choque aos lucenses (32-24). Achegábase o Leyma, pero os de Naxto Lezkano non permitían que a diferenza baixase de cinco puntos e íanse ao descanso cunha pequena renda (40-34).
Iniciaba o terceiro cuarto máis entoado o Leyma Coruña, que asinaba un 0-4 que apertaba o marcador (40-37). O encontro movíase por ?arreones? dos dous equipos. Os laranxas achegábanse e contarrestaban os celestes, nunha tira e afrouxa non exento de erros non forzados. Tras un tempo morto, co Leyma Coruña asexando ao seu rival (54-51), o Breogán asinaba un 7-1 para irse nove arriba ao acto definitivo (61-52).
As diferenzas no luminoso seguían aumentando para os lucenses (67-52) e cando máis complicado tíñao o Leyma Coruña, dous triplos consecutivos de Jorge Sanz metían de novo ao equipo no partido (68-61). Dimitry Fliss deixaría a diferenza en catro puntos (70-66) pero emerxía entón a mellor versión dos locais, que se apoiaban na experiencia de xogadores como Salva Arco, que cun triplo pechaba practicamente o encontro (89-69). Cos dous equipos en bonus e case sen tempo, os coruñeses terminaban claudicando ante o actual líder da Leb Ouro e que mantén a condición de invicto na súa cancha (84-73).
O Leyma Coruña regresará á competición o domingo día 7 ás 17.30 horas para recibir no Palacio dos Deportes de Riazor ao Clavijo.
