O Leyma Coruña recibe mañá ás 18 horas no Palacio dos Deportes de Riazor ao Real Canoe, coa meta de reverter a actual dinámica de nove derrotas seguidas, e farao coa novidade de Jeff Xavier, o último das súas fichaxes, que chega para cubrir a baixa de Braxton Ogbueze, que sofre "un problema no xeonllo que o terá parado entre 4-6 semanas e a ver se responde ben".
"Chegou o xoves pola tarde, fixemos dous adestramentos o venres e mañá sesión de tiro. El ha ha feito catro adestramentos, fáltalle ritmo de competición pero asimilou ben os sistemas", indicou Gustavo Aranzana durante a súa comparecencia de prensa.
Un xogador que chega para "dar un pouco de osíxeno e para poder rotar" nunha semana que chegaron a adestrar ata só sete xogadores, debido a problemas estomacais de Sergi Piñeiro, as baixas de Carlos Martínez, Larry Abia e Zach Monaghan, e a ausencia, ao estar nas Xanelas FIBA, de Jonathan Araujo.
"Temos xogadores descolocados, en posicións que non son as súas e ao chegar Jeff hai que recompor sistemas e o crecemento é menor, pero non me vou a queixar. Non estamos en disposición", declarou o técnico valisoletano, que valora que agora terá máis alternativas no posto dun.
"É máis base que Miso. Pode descargar a Pablo en certos momentos desa responsabilidade e teremos máis rotación", apelou. No entanto, cre que sobre todo "o importante é que mentalmente esteamos ben e podamos dar o máximo".
Outra das claves será "mellorar a defensa, o rebote e ser máis sólidos. Poder mellorar os pequenos detalles. Estou convencido de que xogaremos ben e imos gañar", apuntou o preparador, que lamenta que non se pare a competición cando hai xanelas FIBA e pérdanse xogadores.
"Nós perdemos a Araujo como poderiamos perder a outros xogadores. Non se pode pór dobre xornada nas Xanelas FIBA, é un contrasenso. Prexudica á competición e aos equipos e perdes xogadores que o público quere ver", resolveu.
Lembramos que a causa solidaria mañá nos nosos '17 partidos, 17 causas' da Obra Social da Caixa será a favor da 'Gran Recollida de Alimentos' do Banco de Alimentos Rías Altas e que todos os afeccionados que se pasen polos despachos de billetes con bolsas de comida poderán obter un desconto do 50 % no prezo da súa entrada.
