O Básquet Coruña dedicará este venres día 3 o ?17 partidos, 17 causas? da Obra Social "a Caixa" a AFACO, a Asociación de Familiares de enfermos de Alzheimer e outras demencias afíns da Coruña, coincidindo co 25 aniversario da entidade, neste 2020.
A homenaxe terá lugar durante o derbi entre Leyma Coruña e Club Ourense Baloncesto, da xornada 16, ás 20:00 en #OFornodeRiazor.
AFACO é unha organización sen ánimo de lucro que está dirixida a mellorar a calidade de vida das persoas afectadas de Alzheimer, así como a das súas familias, mediante unha atención integral personalizada e de calidade.
A entidade ten tres centros terapéuticos na Coruña, onde mediante terapias non farmacolóxicas ofertan un servizo de tratamento, atención e coidado tanto para as persoas con enfermidade de Alzheimer, como aos seus familiares. Contan ademais con programas para deterioración cognitiva leve en Oleiros, Betanzos e Culleredo.
AFACO imparte diferentes programas para cada unha das fases do Alzheimer, desde unha con deterioración cognitiva leve, ata unha severa. Cada vez hai máis grupos de atención temperá debido á gran demanda.
Os socios de AFACO teñen dereito a gozar dunha serie de servizos especificamente dirixidos a eles, así como a participar en actividades formativas e de lecer. Ofrecen, entre outros servizos de asesoría legal, asesoramento na xestión de axudas públicas e intervención psicolóxica.
Desde o Básquet Coruña queremos destacar o seu gran labor na axuda ás persoas que sofren Alzheimer e outro tipo de doenzas e ao asesoramento e apoio ás súas familias.
