O Leyma Básquet Coruña xoga de novo en casa mañá venres ás 21:00 horas, tras facelo a semana pasada contra o Club Melilla Baloncesto nun partido que para o conxunto laranxa significou a cuarta vitoria consecutiva en Riazor.
Os de Tito Díaz queren seguir sumando na súa pista e por tanto non hai lugar para a relaxación. Na súa análise previa do partido, o técnico advirte sobre a importancia de estar máximamente alertas na defensa fronte a un rival directo como é o Ourense Provincia Termal, que conta con xogadores clave como a base Pedro Rivero e o pivot Guillermo Rejón, "que o ano pasado foron baluartes para o ascenso e que, ademais de xogar eles ben, fan que o equipo sexa mellor". Xunto a eles suman a súa experiencia os escoltas Diego Kapelan e Jhornan Zamora, así como o pivote ex laranxa Kyle Rowley.
Na súa opinión, trátase dun equipo con boa mestura de experiencia e mocidade -entre estes últimos o cercedense Jonathan Barreiro-, que xoga sen presión polo seu asegurado ascenso á ACB na próxima tempada e que conta con xogadores moi motivados ante o horizonte de poder saltar á máxima categoría da competición nacional dentro das filas do seu actual equipo.
Consciente da importancia de seguir compensando con novas vitorias a seca do arranque da tempada, Tito Díaz subliñou que "non podemos ceder nin un milímetro en casa" e pediu unha vez máis aos coruñeses o seu apoio desde as bancadas, do mesmo xeito que fixeron na xornada anterior. Esta vez co aliciente de tratarse do primeiro derbi da segunda volta da liga e de ter enfronte un equipo que se está mostrando especialmente perigoso e combativo nos seus duelos a domicilio e nas pistas máis difíciles.
