Tal e como imaxinou Tito Díaz ao comezo da serie de playoff, un quinto partido decidirá quen saca billete para verllas contra o Melilla nas semifinais do playoff de ascenso á ACB. Mañá ás 21:00 horas, o Palacio dos Deportes de Riazor volverá ser un fervedoiro de afeccionados do Leyma Básquet Coruña e do Café Candeas Breogán, dispostos a vivir unha nova velada de paixón e bo baloncesto.
Ambos os clubs apuran estas horas previas para a venda de localidades a prezos especiais, ultimar detalles organizativos e, sobre todo, asegurar que os seus xogadores cheguen pertrechados coa máxima enerxía física e moral para afrontar o choque definitivo.
Na súa análise previa deste quinto #derbiromano, o adestrador laranxa considera que é xusto que esta eliminatoria se resolva nun quinto partido, vista a igualdade entre ambos os equipos galegos, nos encontros celebrados estas dúas últimas semanas.
Coa vantaxe de que o Leyma Básquet Coruña conta agora de novo co factor cancha, unha das pezas sobre as que Tito Díaz tentará construír a vitoria, do mesmo xeito que sucedeu noutra partidos clave do final da tempada, incluído o 1-0 do primeiro partido de playoff. Pediu que os coruñeses volvan encher as bancadas do pavillón e animen con forza ao seu equipo, consciente de que "axudaranos moito ver ao noso público connosco".
En segundo lugar, o veterano adestrador conta co plus da mocidade e ilusión do seu equipo como contrapeso á súa inexperiencia nestas lides. "Temos ganas de facer algo histórico, pasar a semifinais, para o noso club", asegura, e apela á tempada extraordinaria realizada polos seus como exemplo de que o soño é posible.
Sabe que, unha vez máis, terán enfronte a un equipo avezado en playoffs, que en ningún momento daranse por vencidos, polo que se aveciña un choque igualado e de alto nivel. Ao pór a lupa nalgúns erros dos últimos encontros, Tito Díaz espera que os seus xogadores melloren no apartado de recuperacións e perdas de balón, un aspecto que na última disputa penalizou notablemente aos coruñeses.
Así mesmo lembra a importancia de dominar o rebote -cando o fixeron na actual serie gañaron-, e non descoidar a defensa nin un segundo, "porque cada erro defensivo noso, o Breogán convérteo case nunha canastra".
Por último, Tito Díaz desexou que mañá siga a festa do baloncesto galego, nunha eliminatoria que está a ser "espectacular en canto a xogo e en canto a ambiente, e que gañe o mellor".
