O Leyma Coruña estreou o marcador de Riazor con folgada vitoria ante o Xuven Cambados

Non houbo sorpresas en Riazor. Onte á noite o LeymaCoruña asegurou o seu pase á semifinal da Copa Galicia ao vencer ao Xuven Cambados por un folgado 86-67, tras un encontro no que os locais foron acrecentando distancias a medida que avanzaban os minutos, aínda que no último cuarto o conxunto visitante puido reducir a diferenza de puntos, que chegou a ser de 26 ao final do terceiro tempo.

A afección volveu gozar do xogo rápido e alegre dos de Tito Díaz, que demostraron a súa firme vontade de manter o estilo que na pasada edición da LEB Ouro levou ao sentimento laranxa a soñar con metas máis altas, augurando así outra emocionante tempada.

Con este resultado, os laranxas, que gañaron o tres encontros xogados no torneo autonómico, mantéñense primeiros na clasificación da liguiña, adiantándose no average -36- ao Ourense Provincia Termal -25-. A terceira posición ocúpaa o Café Candeas Breogán, seguido do Marín Peixegalego e finalmente o XuvenCambados.

O xoves 22 en Ribadeo é a seguinte e última cita do Leyma Coruña na presente fase, con partido ante elCafé Candeas Breogán. Suceda o que suceda, o conxunto herculino ten asegurada a súa participación na semifinal, o sábado 24 no pavillón municipal de Noia. De aí sairá o rival do Río Natura Monbus Obradoiro, clasificado automaticamente para disputar o título na final. Un duelo definitivo que terá lugar ao día seguinte, domingo, na mesma pista.