A empresa Leyma Natura convida a todos os afeccionados ao primeiro patido do Play Off
Todos os afeccionados do Básquet Coruña están convidados a acudir gratuitamente ao primeiro partido do Play Off de ascenso á liga ACB, no que os coruñeses se enfrontarán á Unión Financeira Baloncesto Oviedo, e cuxa entrada será libre por xentileza de Leyma Natura. As invitacións poderán retirarse nas Oficinas do Club a partir de mañá xoves día 10 en horario de 16 a 20 h. e no despacho de billetes do Palacio dos Deportes de Riazor o día do partido en horario de 10 a 14 e de 16 a 21 h. , que se celebrará este venres día 11 ás 21:00 horas.
A compañía produtora de leite e patrocinadora oficial do equipo coruñés, consciente da gran importancia do apoio da afección para resolver con éxito encontros decisivos como os desta primeira fase eliminatoria, quixo axudar ao club a encher a súa cancha coa calor dos seus seguidores ofrecendo as entradas sen custo algún.
Esta primeira fase do Play Off preséntase moi emocionante, debido á igualdade entre os dous equipos, que conseguiron exactamente o mesmo número de vitorias durante a liga regular, e na que só un punto de diferenza situou ao Leyma Natura Básquet Coruña por encima na clasificación. Ese punto de diferenza é o que outorgou aos coruñeses a vantaxe de campo, polo que de ser necesario un terceiro partido para resolver a eliminatoria, este disputaríase outra vez na Coruña.
Dita vantaxe de campo e o igualados que están en cuestión de puntos os dous equipos fan que o ánimo da afección sexa máis crucial se cabe para que o Leyma Natura Básquet Coruña consiga saír vitorioso.
