O derbi galego entre dous dos equipos máis en forma da liga merece ser celebrado nunha data que permita a afluencia das súas respectivas afeccións. Con este obxectivo, a Federación Española de Baloncesto autorizou o cambio de data e hora do encontro da xornada 12 da liga LEB Ouro entre o Leyma Coruña e o Café Candeas Breogán, inicialmente previsto para a noite do martes 29 de novembro en Riazor e que agora se traslada ao festivo 6 de decembro, Día da Constitución, no mesmo escenario, ás 12:30 horas.
Pero moito antes deste partido o Leyma Coruña ten outras citas non menos esixentes, comezando pola deste mesmo venres en casa, na que se mide ao Quesos Cerrato Palencia, ás 21:00 horas. Os palentinos veñen de gañar ao Club Melilla Baloncesto grazas en boa medida á súa base Dani Rodríguez que, con 33 puntos de valoración, forma parte do quinteto ideal da última xornada ligueira.
Entradas en liña para o derbi
Co fin de facilitar a asistencia ao derbi do día 6, tanto para os afeccionados do equipo celeste como para a marea laranxa, o Club herculino habilitará nos días previos a venda en liña de entradas a través da súa web. Os prezos serán os habituais de liga regular, é dicir, 10 euros para adulto e 5 euros a entrada infantil -menores de 18 anos-.
